Search
Monday 16 July 2018
  • :
  • :

டிராஃபிக் ராமசாமி – எஸ்.ஏ.சி. விட்டுச்செல்லும் அடையாளம்…

டிராஃபிக் ராமசாமி – எஸ்.ஏ.சி. விட்டுச்செல்லும் அடையாளம்…

சமூகப் போராளியான டிராஃபிக் ராமசாமியின் வாழ்க்கையை அடிப்படையாக வைத்து உருவாகியிருக்கும் படம் ‘டிராஃபிக் ராமசாமி’.

அவரது அனுமதியுடன் எடுக்கப்பட்டுள்ள இந்தப்படத்தில் டிராஃபிக் ராமசாமியாக எஸ்.ஏ. சந்திரசேகரன் நடித்துள்ளார்.

அவரிடம் சுமார் ஆறு வருடங்களுக்கு மேலாக உதவி இயக்குநராக இருந்த விக்கி டிராஃபிக் ராமசாமி படத்தை இயக்கியுள்ளார்.

இப்படத்தின் மோஷன் போஸ்டர் மற்றும் டீஸர் திரையீட்டு விழாவில்

படத்தைப் பற்றி இயக்குநர் எஸ்.ஏ. சந்திரசேகரன் பேசும் போது,

” இந்தப் படத்தை இயக்கியுள்ள விக்கி என்னைப் பற்றியோ என் படங்கள் பற்றியோ எதுவுமே தெரியாமல் என்னிடம் வந்து சேர்ந்தார்.

ஒரு கட்டத்தில் நான் இனி படம் எதுவும் இயக்கப் போவதில்லை என்று கூறி என்னிடம் இருந்த ஐந்தாறு உதவி இயக்குநர்களை எல்லாம் அனுப்பி விட்டேன். ஆனால் விக்கி போகாமல் உங்கள் கூட இருந்தால் போதும் சம்பளமே வேண்டாம் என்று கூடவே இருந்தார்.

ஒரு நாள் அவர் என்னிடம் ஒரு புத்தகத்தைக் கொடுத்துப் படிக்கச் சொன்னார். அது டிராஃபிக் ராமசாமியின் “ஒன் மேன் ஆர்மி “என்ற வாழ்க்கைக் கதை .

படித்தேன். அதைப் படமாக எடுக்கலாம் என்று விக்கி கூறிய போது என்னால் மறுக்க முடியவில்லை.

கதையைப் படித்து முடித்த போது அவரும் என்னைப் போலவே சமூகத்தில் நடக்கும் அநியாயம் கண்டு பொங்குகிற மனிதராக இருக்கிறார் என்பதை புரிந்து கொண்டேன். தவறு நடந்தால் கோபப்படுவேன் என்ற அவரது குணம் எனக்குப் பிடித்தது.

அவரை வெறும் போஸ்டர் கிழிப்பவராக நினைத்திருந்த எனக்கு அவர் பெரிய போராளியாகத் தெரிந்தார். அவர் வாழ்க்கையில்தான்

எவ்வளவு போராட்ட அனுபவங்கள் என வியந்து போனேன் .

நான் 45 ஆண்டுகளில் 69 படங்கள் இயக்கி விட்டேன். நான் விட்டுச் செல்லும் பெருமையான அடையாளமாக என்ன செய்திருக்கிறோம்? என யோசித்த போது இப்படத்தை அப்படி ஒரு அடையாளமாக எடுக்க நினைத்தேன் . நாங்களே எதிர்பாராத வகையில் பல நல்ல உள்ளங்கள் இதில் இணைந்தார்கள்,

எனக்கு ஜோடியாக ரோகிணி இணைந்தார் . கதாநாயகன் போன்ற பாத்திரத்தில் ஆர்.கே.சுரேஷ் வந்தார். ஒரே காட்சி என்றாலும் நடிக்க ஒப்புக் கொண்ட விஜய் ஆண்டனியை மறக்க முடியாது. இப்படியே குஷ்பூ, சீமான் எல்லாம் படத்துக்குள் வந்தார்கள் .சில காட்சிகளுக்கு ஒப்புக் கொண்டார் பிரகாஷ்ராஜ் . இப்படியே பலரும் படத்துக்குள் வந்து பலம் சேர்த்துள்ளனர்.

இப்படம் டிராஃபிக் ராமசாமியின் வாழ்க்கையின் சம்பவங்களை வைத்து உருவாக்கப்பட்டாலும் முழுக்க முழுக்க அவருடைய வாழ்க்கையைச் சொல்லும் படமில்லை.

இது சர்ச்சைகள் கொண்ட கதைதான். எந்த மிரட்டல் வந்தாலும் பயமில்லை. ஏனென்றால் என் முதல் பட ம் ‘சட்டம் ஒரு இருட்டறை ‘படத்திலேயே மிரட்டல்களைப் பார்த்தவன் நான். நீதிக்கு தண்டனை படம் எடுத்தபோது ராமாவரம் தோட்டத்துக்கு என்னை அழைத்தார் எம்.ஜி.ஆர். அங்கே என்ன நடந்திருக்கும் என்று நான் சொல்லத்தேவையில்லை.” என்று பல்வேறு விஷயங்களை பகிர்ந்துகொண்டார்.

இயக்குநர் விக்கி , நடிகர் ஆர்.கே. சுரேஷ் , நடிகைகள் ரோகிணி , உபாசனா ,ஒளிப்பதிவாளர் குகன் ஆகியோரும் கலந்துகொண்டார்கள்.




Close
Please support the site
By clicking any of these buttons you help our site to get better